Esposiciones
Balenciaga y la pintura española
Les referencies al arte y la cultura española tuvieron siempres bien presentes nel trabayu de Balenciaga. Les llínees simples y minimalistas de los vezos relixosos o'l volume arquitectónicu d'estos texíos son una constante en munches de les sos pieces. L'aire de la bata de cola d'una bailadora flamenca que se dexa ver nos volantes de dellos vistíos, los rellumos del traxe de lluces d'un toreru treslladáu con maestría al paillette bordáu d'una chaqueta boleru, o la estética de la indumentaria na corte de los Austrias reflexada nes negres teles aterciopelaes afataes con acebache de les sos creaciones, son solo dellos exemplos.
Balenciaga revisaba de cutio la hestoria del arte y, con una fuerte personalidá y estilu propiu, caltuvo eses influencies hasta nel so periodu más vanguardista, recuperando fechures históriques y reinterpretándoles de manera bien moderna.La esposición, comisariada por Eloy Martínez de la Pera, cunta con una cuidada selección de cuadros procedentes de colecciones privaes y museos d'ámbitu nacional, como'l Muséu del Prado o'l Muséu de Belles Artes de Bilbao, y con un conxuntu de pervalibles pieces d' indumentaria procedentes de les siguientes instituciones: Muséu Balenciaga de Guetaria, Muséu del Traxe de Madrid y Museu del Disseny de Barcelona, lo mesmo que de colecciones particulares nacionales ya internacionales, unches d'elles nunca antes espuestes.
Del 18 de xunu al 22 de setiembre de 2019
Nel Muséu Thyssen-Bornemisza
Velázquez, Rembrandt, Vermeer.
Miraes allegaes
Nel marcu de la celebración del so Bicentenariu, el Muséu del Prado presenta "Velázquez, Rembrandt, Vermeer. Miraes allegaes", un ambiciosu proyectu que, col patrociniu de la Fundación AXA y la collaboración especial del Rijksmuseum d' Ámsterdam, dedica a la pintura holandesa y española de finales del sieglu XVI y del sieglu XVII.
La esposición, compuesta por 72 obres procedentes del Prado, el Rijksmuseum y 15 prestadores más - el muséu Mauritshuis de La Faya, la National Gallery de Londres o'l Metropolitan de Nueva York, ente otros-, propón una reflexón sobre les tradiciones pictóriques d'España y los Países Baxos. Magar la historiografía artística consideró a estes tradiciones como esencialmente diverxentes, la esposición confronta los mitos históricos y les realidaes artístiques de dambos ámbitos pa cavilgar sobre les numberoses traces que les xunen.
Velázquez, Rembrandt y Vermeer. Miraes allegaes ye una esposición que convida al públicu visitante non solo a esfrutar de la calidá y relevancia de les 72 pieces que la componen, obres de dalgunos de los pintores más almiraos d'Europa nel sieglu XVII, sinón tamién a establecer puntos de comparanza ente elles.
Mientres muncho tiempu paeció lóxicu pensar que l'arte realizáu en diverses partes del continente yera bien distintu: que Velázquez, por casu, ye "bien español" y Rembrandt "bien holandés". Esta apreciación parte de la desmedía influencia que la sensibilidá y l'ideoloxía nacionalistes de los sieglos XIX y XX tuvieron na nuesa forma d'entender l'arte. Los estudiosos d'esa dómina concedieron gran importancia a lo que cada nación tenía de distinta, y estendióse la idea de qu'eses diferencies maniféstense nel arte. Esi puntu de vista minimiza les traces comunes que comparten los artistes europeos.
El casu de la pintura española y holandesa del sieglu XVII ye sintomáticu. Separaes por una guerra, el so arte interpretóse tradicionalmente como contrapuestu. Sicasí, el legáu de la pintura flamenca ya italiana, de la que so influencia define tola pintura europea, interpretóse de forma similar tantu n'España como n'Holanda. En dambos países desenvuélverse nel sieglu XVII una estética alloñada del idealismu ya interesada pola apariencia real de les coses y la forma de representala. Los artistes de los que se muestren sos obres nesta esposición nun espresen nelles la esencia de les sos naciones, sinón que dan voz a idees y planteamientos que compartíen con una comunidá supranacional de ceadores.
"La unidá de la pintura d'Occidente ye unu de los grandes fechos que faen manifiesta la unidá de la cultura europea."
José Ortega y Gasset
Hasta'l 29 de setiembre de 2019Comisariu: Alejandro Vergara, xefe de Conservación de Pintura flamenca y escueles del Norte hasta 1700
Muséu del Prado