Donación de 12 dibuxos de Sebastián Miranda y un bocetu de Penagos al Muséu Casa Natal de Xovellanos

Apocayá incorporáronse a la colección permanente del Muséu un interesante conxuntu de dibuxos del escultor Sebastián Miranda y un bocetu del afamáu ilustrador Rafael de Penagos. Estes obres, procedentes de la colección particular del escultor, ingresaron nel Muséu por aciu una arrogante donación efectuada por Virginia Rebollar Pandiello, fía de la heredera del autor del Retablu del Mar.

Los dibuxos retraten a una serie de figures populares bien del gustu del artista y pueden datase na primer década del sieglu XX , una de les etapes más interesantes na llarga trayectoria de Sebastián Miranda. Resulta de singular interés unu de los dibuxos al tar realizáu al envés d'una carta del artista a la so madre na que-y rellata los planes d'un viaxe a la localidá segoviana de Sepúlveda, pa pintar xuntu al artista de la so mesma xeneración Anselmo Miguel Nieto.

Nel casu de la obra de Penagos atopamos col bocetu del cartelu diseñáu pa la esposición de la primer versión del Retablu del Mar realizada n'escayola policromada. Esta amuesa, celebrada en Xixón, Uviéu y Madrid ente los meses de mayu y xunu de 1933, cuntó con un gran ésitu de públicu y foi reseñada llargamente na prensa del momentu.