El taiwanés Chi Po Hao capta y tresforma les lluces y soníos de les cais de Xixón

El proyeutu 'Lightscape' -que va tar espuestu hasta'l 11 d'avientu- estudia la relación ente los elementos de lluz y soníu en distintes rutes dientro les ciudaes de Xixón, Taipei y Nueva York, identificando correlaciones ente la densidá de les fontes de lluz artificial y el nivel acústicu.

Llaboral Centru d'Arte y Creación Industrial presenta'l proyeutu Lightscape, desenvueltu pol artista taiwanés Chi Po-Hao na so residencia de producción nel Centru. Esta propuesta enmárcase dientro del alcuerdu lleváu a cabu, per tercer añu consecutivu, ente'l Centru d'Arte de Xixón y el National Taiwan Museum of Fine Arts (NTMOFA).

Lightscape estudia la relación ente los elementos de lluz y soníu en distintes rutes dientro de la ciudá de Xixón, identificando correlaciones ente la densidá de les fontes de lluz artificial y el nivel acústicu, y compáralu con otres ciudaes como Taipei o Nueva York. Frutu de la so residencia en Llaboral dase llugar el trabayu final que presenta: tres vídeos y una instalación audiu-visual na Sala de Proyeutos de Llaboral. La instalación componse d'una pieza sonoraxenerativa a partir d'una grabación en vídeu de 360º fechu nes cais de Xixón y configuráu al traviés d'ocho canales d'audiu. Amás, la instalación tamién se compón de dellos paragües qu'actúen como pantalla d'un micro-proyeutor fabricáu pol mesmu artista nel fabLAB Asturies de Llaboral, que interactúen cola composición sonora. Estes obres van permanecer espuestes en Llaboral Centru d'Arte hasta'l 11 d'avientu.

El proyeutu tien por oxetu captar y tresformar les lluces artificiales de les ciudaes mientres la nueche, representaes como elementos visuales, imaxenes en movimientu y manifestaciones performatives. Col fin d'afondar na relación ente la ciudá como interfaz y les lluces artificiales, según na manera en que les persones les perciben, l'artista identifica los cambeos de lluces y solombres que dan llugar a unes imaxenes y soníos distintos.

En Xixón trabayó en distintes cais, que van dende Llaboral Centru d'Arte hasta'l centru de la ciudá, pasando polos barrios de La Guía, Les Mestes y L'Arena. Esti trabayu actúa como una partitura, na que l'allumáu públicu, les lluces de les tiendes, los semáforos, o'l ruiu de los coches, son la tema principal d'esta composición musical.

Amás de nes cais de Xixón, Chi Po Hao trabayó principalmente nel fabLAB y nel Llaboratoriu de Soníu. Tal que afirma'l mesmu artista "traté de sentir les diferencies ente una ciudá allegada como Taipéi (de la que ye orixinariu) y un llugar relativamente ampliu y modernu como Xixón".

Pa Po-Hao "el sistema de llume dexa a les persones aprovechar la nueche pa espandir los sos momentos d'ociu, y el consumu yá nun se llinda a l'amanecida y al atapecer, según les condiciones climátiques y otros ritmos naturales, tampoco tienen nada que ver colos sentimientos y les diferencies nel estilu de vida de les persones. D'esta forma, la xente finalmente tien la capacidá de programar toles xeres na so vida diaria.".

Chi Po-Hao ye un músicu y artista sonoru taiwanés nacíu en Taipéi. Tien un máster en música (Goldsmiths College, Universidá de Londres) y una llicenciatura n'Económiques (Universidá Nacional de Taiwán). La so área de trabayu primordial ye'l soníu, principalmente la electrónica en vivu, les instalaciones y les composiciones electroacústiques. Polo xeneral, nes sos actuaciones en direutu utiliza oxetos qu'él mesmu diseñó o que recuperó de dalgún dispositivu eleutrónicu, materiales cotidianos y desfechos.

La so obra actual céntrase principalmente na perceición del ritmu y les interacciones que tienen llugar nesi procesu de perceición. Al artista interésa-y afayar cómo escuchamos ya interpretamos el soníu que nos arrodia y la forma en que se representa.