Inauguración de la esposición del Certamen Nicanor Piñole de Pintura en Sotrondio

El pintor asturianu Juan Fernández Álava ganó per segundu añu y de manera consecutiva'l XXIII Certame Nacional de Pintura Nicanor Piñole, cola obra "Bea", de la que'l xuráu destacó la introspeición, el silenciu, la reflexón y los sentimientos que tresllada la observación de la composición. El cuadru foi escoyíu por unanimidá del xuráu d'ente los diecisiete cuadros escoyíos de los sesenta y cinco presentaos al concursu dende distintes procedencies.
El xuráu, formáu por Alfonso Palacio, Director del Muséu de Belles Artes d'Asturies, José A. Castañón, ex director del mesmu muséu, y Alfonso Granda, profesor de la Escuela d'Artes d'Uviéu, alcordaron por unanimidá conceder el premiu absolutu del certame, dotáu con 1.500 euros, a Juan Fernández Álava, más dos accésits a les obres: "Como si nunca tuviera ellí", d'Esther Cuesta Sainz, y "Episodios Nacionales", de Antonina Muñoz López.
Juan Fernández Álava ye un  artista (1978) natural de Piedres Blanques, residente en Xixón. Ye un pintor entusiasta de semeyes y paisaxes, xéneros que considera  siempres llenos d'interés y posibilidaes. Nel añu 2015 espunxo una colección de cuadros sol títulu "Retrato real" na Galería Espaciu Líquidu de Xixón y otra amuesa titulada "Felices coincidencies", en La New Gallery de Madrid. Amás d'otres esposiciones individuales, formó parte d'amueses colectives y la so obra ta presente en colecciones del Ministeriu de Cultura, el Principáu d'Asturies, el Conceyu de Castrillón, la Fundación Alimerka y colecciones privaes en Francia y España.
La muestra coles diecisiete obres escoyíes del Certame de Pintura Nicanor Piñole inaugose'l miércoles 30 de mayu na Casa  la Mocedá de Sotrondio, xuntu cola esposición de la categoría escolar d'esti certame, de la que formen parte les 32 obres que fueron escoyíes d'ente toles que presentaron los colexos del conceyu.
Dambes esposiciones van poder visitase hasta'l 15 de xunu na Casa de la Mocedá de Samartín del Rei Aurelio, n'horariu de mañana y tarde. La clausura y entrega de premios de les categoríes llibre y escolar va tener llugar el mesmu día de  peslle de la esposición, na Aula Cultural La Plaza, en Sotrondio.