Presentación del llibru TRASSG Y LA MÚSICA de Martín Ardines

13.03.2019

Esti miércoles 13 de marzu a les 19:00 hores na Casa de la Mocedá de Samartín del Rei Aurelio en Sotrondio va tener llugar la presentación del llibru impresu en llingua asturiana TRASSG Y LA MÚSICA de Xose Ramón Martín Ardines, con testos en rusu de Oleg Krotko, n'inglés de Steve Jesson, en portugués de Gustavo Granja y en francés de Lucía Fernández Suárez.

Fadrán la presentación María Alonso García, conceyala d'Educación y Cultura del Conceyu de Samartín del Rei Aurelio;Aurora Suárez Carrio, maestra y directora del Grupu Teatru Refaxu de Blimea y Pablo X.Manzano Rodríguez, maestru y Académicu de la Llingua Asturiana.

D'esta manera conmemórase'l décimu aniversariu de la creación de Trassg , personaxe qu'apaez nel branu de 2009 dientro la collaboración ente Martín Ardines y la so fía Anxan Martín no qu'entama a llamase LES AVENTURES DE TRASSG, un cómic por capítulos formáu por viñetes que se publiquen na última páxina del periódicu mensual CIUDÁ LLINEAL hasta qu'ésti dexó de publicase nel mes d'abril de 2013. Mientres esos cuatro años publicáronse 45 capítulos nos que Trassg pasó por delles vivencies y reflexones.

En xineru de 2010 apaeció una páxina web dedicada al personaxe na que se recoyíen los diversos capítulos y dellos apartaos con actividaes y xuegos: www.trassg.com.

N'abril de 2011 la escuela d'Educación Infantil de 0 a 3 años de L'Entregu acoyó la presentación de los cuentos "Trassg el Trasgu", "Trassg y la Primavera" y "Trassg y la Música"dientro de les actividaes pa celebrar el Día del Llibru.

L'añu pasáu y dempués de cinco años gracies a la collaboración de dellos amigos publicose'l llibru dixital en cinco idiomes col que Trassg presentó les sos aventures al traviés de la rede y agora publícase en formatu tradicional pa llegar a más llectores.

Nesta ocasión Trassg fai un percorríu pola hestoria de la música al traviés de los istrumentos musicales qu'afaya nel Muséu de los Istrumentos Musicales de Bruxeles.

La edición d'esti llibru forma parte de les actividaes de l'Asociación Cultural Al Llau del Llar venceyada a Radio San Martín ,qu'amás del programa radiofónicu col mesmu nome tien un magacín dixital nel que pueden atopase entevistes, noticies y páxines dedicaes al arte, viaxes y deporte: www.alllaudelllar.es