Radio San Martín na Fira B!

Radio San Martín participó nes xornaes profesionales de Fira B! El mercáu profesional de música y artes escéniques de les Isles Baleares pesllóse con más de 600 profesionales que pasaron poles xornaes que dende'l 3 al 6 d'ochobre lleváronse a cabu nel CaixaForum de Palma.

Na quinta edición de Fira B! participaron un total de 120 programadores de les artes escéniques y la música de más de 20 países distintos y veníos de cuatro continentes: Europa, África, América y Asia. Los profesionales pudieron establecer contactu directu colos artistes del sector de la música y les artes escéniques de les Isles Baleares que dieron a conocer les sos propuestes, en formatu de showcase o pieza escénica o bien al traviés de les xuntes, charres, alcuentros y cafés que se fixeron na Fira B! 2019.

Esta edición destaca pola gran cantidá de públicu qu'allegó a los conciertos de música y a los espectáculos d'artes escéniques. Tamién destaca l'aumentu de profesionales nes xornaes de CaixaForum, que respondieron con munches más persones a les conferencies y meses redondes entamaes en Fira B 2019!

Fira B! ta entamada pola Conselleria de Presidència, Cultura i Igualtat, al traviés del Institut d'Estudis Baleàrics, y cola collaboración del Consell de Mallorca y l' Ajuntament de Palma.

Radio San Martín faló con dellos grupos y artistes, dalgunes de les entrevistes escucharémosles nel programa especial d'Al Llau del Llar dedicáu a la Fira B!, xunto a dellos temes musicales de les propuestes que se presentaron nel mercáu profesional de música y artes escéniques de les Isles Baleares. Ente ellos:  el grupu catalán "Las migas", l'actriz y cantante Rita Barber de quien escucharemos dellos temes del so discu "De mar a mar", la manager Elena Pérez que nos presenta al grupu canariu CARACOLES, Mara Maso presentándonos al grupu de danza catalán de Laia Santanach , al director y actor mallorquín Josué Guas , a l'actriz, creadora y directora Vicka Duran, al músicu Gabriel Fiol y el jazz del músicu Moisés P. Sánchez .